العالم قامت فيه شوطة
Posted by ossamando on December 26, 2007
العالم قامت فيه شوطة
أحواله كده مش مظبوطة
والأغرب فى اللى بيحصلة
الناس بتغنى و مبسوطة
ندايقهم ليه بأزمة أوطة
كركوبه و شاده فى سحنتها
بترن-تلعلع-ضحكتها
ومعانده العمر و بتحاربة
بمعالم تالفه و مقشوطة
وشفايف ناشفة و مأروطة
ماشيه بتتمايل خطوتها
وبتشكى عيونهم حاصرتها
حواجبهم ليها بيتلاعبوا
كسفوها -النغة-الكتكوتة
وبتصرخ جد المسخوطة
وان حب راجلها يسكتها
بتقول مبقاش فى محبتها
ولا عاشق ليها و فى قلبة
الواد الفت الفطوطة
والعالم قامت فيه شوطة
وعجوز الشؤم المتصابى
متدهول عامل متغابى
وبيجرى و هبله أل أيه سحبة
ورى كل صبية و قطقوطة
فى اديها جيلاتى و بسكوتة
وفى كل حكاية بخسارة
كام شقة و كام عقد عمارة
وان حد يحاول و يحاسبة
يوعد بوعودة الممطوطة
بتدوب سكر فى الشكلوطة
ملايينة تتسرسب بالراحة
وولاده البايتين سواحة
دمعتهم على الخد انتحبوا
ومراتة دى ماتت منقوطة
والعالم قامت فيه شوطة
وشباب متمزع من جوه
متدلع ولا عنده مروة
من الحسره تشوفهم يتصاعبوا
سحنتهم غبرة و مشفوطة
فى القهوة جتتهم محطوطة
وده ماشى يفرقع بلبانته
والديسكو يرقص له شهامتة
يتهز و يركن على صاحبة
يتلز -العجل- الشحطوطة
ويطرقع أجعص زغروتة
والنونو البية مش على باله
ليه يشقى و ليه يظلم حالة
ما هو بابى مأمنله رواتبة
والمامى لفاله الفوطةو العالم قامت فيه شوطة
وبنات على حسب الريح ماشية
لا كسوف فى وشوشهم ولا خشية
على”ريدج” و “مايكل” يتعاتبوا
مين احلى شفايفة زغنطوطة
مين بوستة حكاية و حدوتة
ودى لابسة “ستريتش” و محدوفة
على عربى و شايفين لها شوفة
فى الكوشة -قال- اعدت جنبة
بهدلها , و رجعت ملطوطة
بالحسرة انكتمت مبطوطة
والحلوة دى ماشية بتتمخطر
وهاتعمل كل اللى ما يخطر
شاورولها و راحم فين شربوا
راجعين و ما بينهم مشقوطة
قاطعين بلوزتها المشروطة
العالم قامت فيه شوطة
أحواله كده مش مظبوطة
والأغرب فى اللى بيحصلة
الناس بتغنى و مبسوطة
ندايقهم ليه بأزمة أوطة
أحمد نذير بكداش said
Ossama ::.
=========
أه زبتهالك,
أكتير شي عجبني
وشباب متمزع من جوه
متدلع ولا عنده مروة
من الحسره تشوفهم يتصاعبوا
سحنتهم غبرة و مشفوطة
فى القهوة جتتهم محطوطة
وده ماشى يفرقع بلبانته
والديسكو يرقص له شهامتة
ossamando said
ربنا يخليك يا صاحبى,, و نا حبيت اكتب الموضوع ده علشان ده فعلا بقى حال الدنيا من شباب ااعد على القهاوى و شباب بايت في الديسكوهات و رجالة بتضيع فلوسها على البنات اللى قد ولاده و حاجات تانية كتير بتئذينى انا و بلدى