Posted by ossamando on January 9, 2008
من حوالى يومين كدة كنت بتفرج على البرنامج صباح الخير يا مصر,, و طبعا انا كنت بتفرج علية علشان مس لاقى حاجة كويسة على النيل سات,, فا كانوا عمالين يجيبوا فقرات مملة زى العادة,, لحد ما لقيت المزيعة جايبة راجل لابس بدلة كده و كرافتة زى اللى بيعملوا معاهم لقائات كل يوم بس المرادى الموضوع كان على الأنابيب,, فا المزيعة زى عادتها سلمت علية و قالتلة حضرتك مشرفنا النهاردة بنفس الطريقة بتاعت كل يوم و بعد كدة بدا الحوار اللى كان كالأتى
المزيعة: حضرتك احنا وصلنا أن سعر الأنبوبة بقى ب8 جنية و ساعات 10 جنية
الأستاذ أبو بدلة: لأ حضرتك الكلام دة مش مظبوط ,, السعر بيختلف حسب الدور,, و السنة دى غير السنة اللى فاتت
المزيعة: أزاى بيختلف حسب الدور,, حضرتك ممكن توضح؟
الأستاذ أبو بدلة: يعنى لو المواطن فى الدور الأرضى هياخدها مثلا ب7,, لو فى الأول تبقى ب8 ,, فى التانى أكيد أغلى شوية,, و السنة دى تختلف عن السنة اللى فاتت
كلام كتير بعد كدة و طبعا الهجوم جامد على أبو بدلة
المزيعة: طب لو الواحد عايز يجيبها أرخص من السعر دة يعمل أية؟
الأستاذ أبو بدلة: يروح يجيبها من المخازن
معانا تليفون ألو
المواطن: حضرتك بتقول الواحد ممكن يجيبها من المخازن أرخص ,,, انا روحت المخازن من الساعة 4 لحد الساعة 8 و مخدتش حاجه
أبو بدلة: أبقى روح بدرى شوية و انت تلاقى (من الشروق حتى الغروب) هى دى المواعيد,, و السنادى غير السنة اللى فاتت
تليفون تانى الو
مواطن: طب حضرتك انا روحت 3 مرات من الساعه 10 الصبح لحد 3 الظهر و كل مرة يدونا وحدة منفسة
أبو بدلة: سكت شوية,, أبقى روح تانى و المرادى هتاخدها سليمة,, السنة دى فى فرق عن السنة اللى فاتت
ضحك المواطن و قالوا شكرا
طبعا المفروض مش هو بس الى يضحك,, المفروض الناس اللى ساكنين فى الدور التانى أو أعلى ,, و اللى بيقفوا من الساعة 4 للساعة 8 و بعدين يقولولهم تعالوا بدرى شوية و اللى بيروح بدرى و ياخدها منفسة
كل دول لازم يضحكوا على الحال اللى بقينا علية
بس أحمد ربنا أن في حلول للمشكلة دى
يا أما تحول غاز طبيعى يا أما تنقل شقتك فى البدروم و ساعتها هتاخدها ب 6 جنية
و حط فى دماغك على طول أن السنة دى أحسن من اللى فاتت
This entry was posted on January 9, 2008 at 7:40 pm and is filed under Uncategorized.
You can follow any responses to this entry through the RSS 2.0 feed.
You can leave a response, or trackback from your own site.
أحمد نذير بكداش said
صبا ح الخير يا مصر
Sheko said
فعلن صباح الخير يا مصر يا بكداش طب المشكلة ان الناس الغلابا دول ساكنين فوق السطوح بيدفعوا كام دول !!!!!!!!! وكل ده عشان بنصدر الغاز برا نقوم نرفع سعره للدرجه ديه وكمان الفترة ديه فواتير الكهرباء بتيجى بأسعار عالية جدا ديه برضه بتفرق بالدور هههههههههههه
ossamando said
فعلا باين كل حاجه هنا باقت تفرق فى الدور تعيش واطى محدش يكلمك و محدش ياخد منك كتير,, تعيش عالى تتخاسب على طول و تموت عندك ضغط عالى كل واحد يشوف عايز يعيش أزاى
أحمد نذير بكداش said
لا بس, لو عشت عالي ما راح يكلمك حد..
بس عالي البحكي عنها غير عالي البتحكي عنها
HORUS 88 said
عندهم حق ,,, اسنادى أحسن من اللى قبلها ,,, بقينا بنصدر غاز لإسرائيل
عقبال عنكم جميعا :s
ossamando said
ههههههههه,, فعلا عقبال عندنا